اليوم خديت الآنسة للافيزيت، فالمدخل كاياخدو منك المعلومات كايسجلوها فواحد الروجيستر ومن بعد كايوجهوك عند الكونتابل باش تدفع لاكارت كريز وتأدي الواجبات ديالك، في انتظار مرور السيارة من مختلف مراحل الفحص…
مشيت عند صاحبنا وعطيتو لاكارط ومعاها 370 درهم حسب الطلب ديالو.
السيد التقني اللي كايقوم بالفحص، جازاه الله خيرا، كايقوليك غير سير انتظر فالمخرج ديال المركز وهو غادي يجيب ليك السيارة حتى لعندك عند نهاية الفحص ومعاها الوريقات…
وداك الشي اللي كان بالفعل، السيد جابلي السيارة ومعاها الورقة ديال لافيزيت واللصقة المعلومة..
بطبيعة الحال، طلبت منو الفاتورة، إلا أنه قال لي هاد الشي اللي كايعطيوني، إلى بغيتي شي حاجة أخرى شوف مع الكونطابل.
خوكوم ما كانش من العاكزين، مشيت عند الجميم وقلتلو الله يخليك ما عطيتينيش الفاتورة! جاوبني بالنبرة ديال شي واحد تايق فراسو: واش الأخ شركة؟ رديت عليه بنفس النبرة: الأخ عطاك فلوس وخصو عليهوم فاتورة تفصيلية، بغض النظر واش شركة ولا ماشي شركة!!!
الموهيم صاحبنا بدا تايبرقق فعينيه واحد الهنيهة، ومنين شافني مصر ماضحكت ما رمشت، دار ربع دورة في اتجاه المشقوف اللي قدامو وطبع لي الفاتورة ومدهالي بالزربة وبدا كايعيط على اللي مورايا فالصف، زعما راني مزروب…
وأنا نزرب عليه: صديقي، هاد الفاتورة فيها 350 درهم ؟!
هو: إيه، على حساب الخيل ديالك.
أنا: الخيل ديالي هادي نص ساعة شديتي عليه 370 درهم؟ واش كاينة شي خدمة أخرى ما داخلاش فهاد الفاتورة وغادي تعطيني عليها فاتورة تانية ملحقة؟!
الصديق مافهمش باش تبلى، دار واحد الضحكة لئيمة وما زاد حتى كلمة ولو كذبا أن الأمر زعما يتعلق بخطأ أو نسيان، دار هاد المرة نصف دورة في اتجاه المجر وجبد أحسن 20 درهم وسرحها ليا فالكونطوار…
الموهيم رد الفعل ديال هاد المومن كايدل بشكل كبير أن القضية ما كانتش خطأ وأنهم موالفين (بطبيعة الحال بدون تعميم) ياخدو اللي بغاو من عند بنادم، مطمئنين لأن الأغلبية الساحقة ديال المغاربة ما كاتطلبش الفاتورة على الخدمات و الأشياء اللي كاتشريها، الشيئ اللي كايسمح لبحال هاد النمادج يجمعو يوميا مبالغ ليست بسيطة وكايفرقوها بيناتهوم فالعشية “حراما طيبا”.
بطبيعة الحال، خرجت ناشط بالفاتورة وال20 درهم فيدي، وشرحت الفيلم للسيد اللي كان مورايا باش ما يديرولوش عامرة فخاوية.
Visite technique hors taxes : 200 dhs;
Timbre & taxes diverses: 150 dhs !!
ومازال باغين يشفرو
لا حول ولا قوة إلا بالله العلي العظيم.
منقول
المصدر : https://assadaassiassi.com/?p=6628
عذراً التعليقات مغلقة