بصفتي Glover مند أكتر من عام بغيت نوضح سبب ديالي وديال جميع les livreurs لي معايا فالخدمة ولي وقفو ليوم وحتا لي موقفوش وبغيت هاد رسالة توصل للادارة ديال Glovo ويلقاو حل لهادشي ليوم قبل من غدا .
ماعلينا اليوم الأحد 14 ماي 2023 تافقوا أغلبية les livreurs باش منخدموش احتجاجا على الوضعية لي تنعيشوا مع هاد الشركة حيت من حقنا نوقفوا وباش نوضحوا الأمور غانعطيكم مجموعة من المشاكل والاكراهات والمطالب لي لا رجعت فيها من طرفنا وكذلك بعض النقط لي ضروري تتبدل الى بغات الشركة نرجعوا نخدموا معاها.
1 – باش يكون في علم الجميع انه livreur راه تيجيب لموطور من عندو يعني ملك خاص وكذلك ليصانص كنخلصوه من جيبنا بحيث كل نهار تنصرفو 60dh غي علا ليصانص وكل10ايام عندنا 80 dh ديال فيدونج من جيبنا وكذلك 450dh ديال لاصيرونص كل تلات اشهر وكدلك كل تلات اشهر على اقل حاجا خصني نصرف على خسائر لموطور تقريبا 1000dh ديال بياس هادشي الى مدرتي تا شي كسيدة وبقيتي خدام عادي في امان الله زيد عليها جاكيطا ديال glovo لي داير ليهم اشهار فابور وخصني نخلصها ليهم ب280dh و لبوكصا تاهيا اشهار فابور وتنخلصها ب 300dh وكدلك abonnement ديال تليفون باش تنخدم معglovo ونعيط لكليان تاهيا تنخلصها من جيبي … هدشي كامل ونهار منكونش خدام الى خديت نهار واحد روبو مكنتخلص فيه حتا درهم ….
2 – بالنسبة لكوموند وحدا يعني commande unique أقل تمن خاصني نوصل بيه شي كوموند عاديا خاصو يكون هو 10dh بنهار و15dh بالليل عاد نزيدو عليها المسافة والوزن ديال كوموند .. تخايلو معايا ولينا مع 3 الليل خاصك توصل كوموند ب7dh ولا 10dh علما ان هاد كوموند ممكن تتعطل عند ريسطو 30دقيقة ونتا غاتوصلها ف 10 دقايق للزبون يعني ساعة تقريبا غادي ندخل فيها10dh ولا15dh ومجموع ساعات لي ممكن نخدم معglovo هو 10ساعات .. يعني واخا ندخل 200dh فنهار ونقص منها ليصانص والمصاريف لي دوينا عليهم فالنقطة اللولة غانولي انا طالع ليا النهار بناقص .
3 – بالنسبة لكوموند لي تتكون فيها جوج يعني commande groupée !! هاد النقطة بالاساس غريبة وعجيبة تخيلو معايا كاتعطيك شركةglovo جوج كوموندات توصلهم لجوج عناوين فبلايص مختالفين على بعضياتهم متلا كنهزو جوج ديال ليكوموند دقة وحدا من ماكدونالد المعاريف وحدا خاصني نحطها ف الزيراوي وتانيا غادا تال سقراط وتايخلصوك على لولا ب8dh وتانيا تايعطيوك عليها 2dh !!! واش تايضحكو علينا ولا على الوقت ولا لقاونا ماشي رجال يمكن راه حشوما وبزاف 2dh !!! ديالاش ديال العداب ولا مصاريف ليصانص ولا لموطور ولا الاخطار ديال طريق ولا ديالاش !
4 – بالنسبة les commandes magic يعني لكليان فاش كاينسا سوارت ولا بيسي ولا بغا شي تقدية مكيناش ف ابليكاسيو glovo او شي service لي تايكون قانوني تانتسخرو ليه حنا وتنقضيو ليه لغرض وهو مرتاح فبلاصتو .. هاد الخدمة glovo كتاخد فيها من عند لكليان مابين35dh حتال 45dh ولكن الغريب فالامر تايخلصو ليفرو غي ب 10dh او 8dh !!!واش هادا منطقي ؟
5 – بالنسبة للنقطة ديال التميز أي la note d’excelence .. هي واحد نقطة دايراهاglovo باش تبقا المنافسة بين لخدامة وكل نهار هاد نقطة كتبقا تطلع وتنزل على حساب شحال خدمتي فالاوقات لي بغاتكglovo تخدم فيهم … يعني متلا الى بغتي تخدم من8 صباح تال3 العشية وتدخل ترتاح مت وليداتك او تمشي تعيش حياتك عادي فحال اي واحد خدام وعندو حياة موازية بعيدة على تمارة ودوران فوق الموطورف glovo غادا تطيح ليك النقطة وتخليك متلقاش سوايع خاويين باش تخدم وغادي تضطر انك تبقا تلقا سوايع لي متيخدم فيهم غي ناس قلال متلا من مورا 00:00 الليل حتال 4صباح ومن08:00 صباح حتال 10 صباح ومن 12:00 حتال14:00 يعني غي اوقات الدروة بالنسبة لglovo وهدشي لي تايخلي les livreurs ابقاو خارجين نهار كامل خدامين يعني بطريقة غير مباشرةglovo كتفرض عليك تجيب موطورك وتخلص مصاريف ليصانص والخسائر وتلفون وكلشي هدشي وفلخر يخدموك عندهك لوقت بي بغاو وباش ما بغاو والى معجبكش لحال مخصكش تهدر وكل مناسبة او عيد او رمضان او فصل صيف تايوقفو تقريبا 300 ليفرور بدون حق وفنفس لوقت تايدخلو 500 او 600 واحد باقين جداد ومسكين بنادم تايكون باقي تايشوف ومتيقglovoعلى انها الحل ديالو كشاب باغي يخدم راسو ومايكونش مرهون فشي شركة ولا تايتنفخ عليه شي واحد ….. ولكنglovo كتستغل هاد الحماس لي ديما تايدخلو بيه المجموعة ديال ليفرورا جداد وتايبقاو يجريو على اي واحد طالب بادنى حقوق ديالو ….
بالنسبة لسنة 2022 انا من الناس لي حرماتنيglovo من مبلغ 7500 dh بدون موجب حق .. نشرح ليكم كفاش .. كانتglovo دايرا مسابقة تحفيزية باش ليفرورا يبداو يوصلو اكتر من20 commandes كل نهار دارو مسابقة كتبدا من 1/1/2022 وغتسالي نهار 30/12/2022 وتم الاعلان الرسمي ديالها فالموقع الخاص ديالهوم وكدلك كتبان فبوفيل ديال كاع ليفرورا اي دايرين معانا الى وصلتي ل2500 commandes غتاخد 3500 dh على طول السنة والى وصلتي 3500 commandes غتاخد 1500dh والى وصلتي 4500 commandes غتاخد 2500dh يعني الى كملتي 4500commandes فسنة 2022 غتحصل على 7500dh …. المهم بزاف دراري قدرو ياخد منحة اولة كاين لي خدا لولا وتانيا وكاين لي خدا حتا تالتة ولكن الغريب فالامر والخايبا كاع انهم جاو فشهر 9 septembre وقالو لينا بلي غاتوقف هاد المسابقة … وكاينين ظراري لي كانت باقا ليهم غا10 commandes وياخدوها وكاين بي بقات ليه 20 cmnd …. كفاش هاد ناس عطاتهم خاطرهم يعطيو لناس ربحو ويحرمو ناس اخرين تايتسناو دورهم وكفاش محتارموش وقت المسابقة لي فيه سنة كاملا ….
…
…
..
ماعلينا هاد نقاط لي دكرت دبا شويا من عدة نقط اخرى لي صراحة les livreurs تايعانيو منهم وساكتين حيت مشي لخاطرهم كاين لي مزوج كاين لي تايقرا ماين لي ضروفو متتخولش ليه يوقف نهار واحد على العمل والشركة مستغلة هاد الوضع والمعانات وزايدا فيه راه هدشي كايتسما الاستعباد … لذلك رسالة واضحة لهاد شركة حاولي تلقاي حل ليوم قبل غدا وتحتارمي هاد رواح وهاد شباب لي مضحيا بحياتها وصحتها فوق الدراجات نارية كاين فينا لي تهرس كاين لي مات كاين لي مرض بسدر وركابيه بل برد وشمش وعداب وشفارة لي تايتبعونا وتايلوحو بنادم فوق موطورو … راه ليفرور ماشي شفار ولا انسان خايب راه مواطن عادي خدام بعرق جبينو احتارمونا وعطيونا حقنا ونتوما تخدمو وحنا نخدمو … ماشي تحرتو علينا كون بغينا لي يحرت علينا كون خدمنا فبلايص اخرين ولكن راه كاين فينا شباب وكاين فينا لي بدبلومات ديالو وتايهدير جوج لغات اجنبية …
….
…
…
والرسالة الاخيرة غاتكون لخوتي فالحرفة حاولوا نتجمعو على كلمة راجل واحد وباراكا من تعطايت وتوصلو هدرا للشركة احتارمو كرامتكم ورجولتكم حيت الى بعتي كرامتك ليوم متسناش لي يعطيها ليك غدا واي درهم غتاكلها فطريق الدل عرف راه غادي يعايروك بيها شركة وولادك غدا ولا بعدو وغادي تموت محني وراسك فالارض
والسلام
المصدر : https://assadaassiassi.com/?p=21643
عذراً التعليقات مغلقة