نمشيو دقة دقة ونحاولو، لعل وعسى…
واش كاين شي حاجة كتمنع الاحتجاج على شي حد ولا على شي حاجة؟
طبعا لاااااا، الاحتجاج حق… ولكن حتى التنبيه لبعض الانزلاقات حق…
واش كاين شي مسؤول مُقدس؟
بالعمى، اللي حط يدِّيه فالمسؤولية مفروض عليه يوجّد راسو للدق… ولكن مفروض كذلك نآمنوا باللي العاطفة ما كافياش لتحقيق الرقابة الشعبية…
واش من حق أنصار فريق ديال الكرة يدافعوا على فريقهم ويحتجوا على أي واحد، أو أي جهة، يُشتبه فأنهم كيحاربوه؟
طبعااااا، من حقهم، بل من واجبهم، ولكن كذلك راه من الحق، ومن الواجب، التنبيه إلى ضرورة “التناسب” بين سبب الاحتجاج وبين شكل، وحجم، وصيغة، الاحتجاج…
بمعنى؟
لِنَفرِض جدلا أن فريق كيتعرّض لمؤامرة، ولنفرض گاااع أنه عندك من الدلائل (الدلائل ماشئ الانطباعات العاطفية) ما يؤكد هاد المؤامرة، ولِنَفرِض گاااااااااع أن الجامعة فيها شي خلية سرية الدور ديالها هو عرقلة مسيرة هاد الفريق، بشحن الحُكّام وضبط البرمجة وزيد وزيد، واش الحل هو تطلق حملة ضد رئيس الجامعة (بوحدو ?) وتسميه الفاسد؟
زعما يلا وقع لك مشكل مع الروسوڤور ديال الطوبيس الحل هو تفرشخ الطوبيس باش تتسمَّى خذيتي حقك؟
فقضية التحكيم والبرمجة ما غادي نأكد ما غادي ننفي، ولكن لِنَفرِض أن ما يُقال صحيح، واش الاحتجاج يكون بحملة #لقجع_فاسد ؟
علاش ما يكونش الاحتجاج على الجامعة كلها؟
علاش بالضبط فوزي لقجع كشخص؟
علاش بالضبط دابا وفهاد الوقت؟
علاش زعما كلمة فاسد؟
علاش ماشي بشعار آخر؟
ملِّي كتقول فلان فاسد، ويلا ما تحدد المطلب ديالك، فهنا كتبيّن باللي الحملة ضد الشخص، لتحطيم الشخص، ماشي لتحقيق مطلب!!
شنو المطلب ديال الحملة؟
شخصيا ما عرفتش!
شكون طلق الحملة؟
شخصيا ما عرفتش!
شكون مستفيد من الحملة؟
هنا نِقاش كبير… ماشي كيف قالوا وحدين حگا ما حگا واش ما ننتقدوش شي مسؤول باش الجيران ما يضحكوش علينا…
لا ماشي بهاد السطحية…
ننتقدووووووووووو…
ملِّي نحتج باش ندافع على راسي وكنحدد المطلب هذا موضوع، وملِّي كندير حملة ونستعمل قاموس العديان، وفسياق حساس، وبلا ما نحدد مطلب ولا والو، فهنا كنكون كنماركي فالشبكة ديالي…
بكل روح رياضية…
ملِّي كتقول #لقجع_فاسد فراك تجاوزتي الدفاع على فريقك إلى الطعن فمؤسسة من مؤسسات بلادك…
ياك الهدف هو الاحتجاج على “الحيف” ضد فريق؟ إذن الغاية هي رفع الحيف (يلا كان) ماشي تحطيم صورة شخص وصورة مؤسسة؟
اللوجيك هو هذا…
كاين حاجة من الجُّوج، إما أن المستهدف هو لقجع (برمزيتو فهاد المرحلة) وبلا ما يقولي شي حد شكون هو هاد لقجع گااااع…
وإما الهدف هو تشتيت الكرة، وعِوَض ما الجمهور يركّز مع الفريق ديالو ويحاسب اللي نجح واللي فشل كندِّيوه لنظرية المؤامرة والعدو الخارجي…
هادي تقنية معروفة…
زعما التماسيح والعفاريت ما خلاوناش نخدمو…
يا شي إما ثالثة مجموع فيها بزااااااف ديال إمَّات…
والله أعلم…
المصدر : https://assadaassiassi.com/?p=20121
عذراً التعليقات مغلقة